Plantun de Prouvènço

Pèr coumpara dos planto d'encò nostre

Caltha palustris & Barbilophozia lycopodioides

Gauche-d'aigo

Caltha palustris

Ranunculaceae

Àutri noum : Gauchet-d'aigo, Peirouleto, Bescuchèu, Erbo-dóu-marfoundemen.

Noms en français : Populage des marais, Caltha des marais.

Descripcioun :
Au nostre, lou gauche-d'aigo se vèi soulamen en mountagno que i'agrado lis endré fres e bagna. Douno un pau d'èr à l'auriheto, Ficaria verna, emé si flour jauno, pamens li fueio soun eici redouno, en couor à la baso, ço qu'a douna li noum de peirouleto (pichot peiròu) e de bescuchèu (pichot bescue).

Usanço :
La planto caup, coume lis àutris Ranunculaceae, de proutou-anemounino, pamens li jóuini fueio e flour podon èstre manjado. Autramen fau faire couire mant'un cop la planto o la faire seca. Èi counseiado pèr lucha contro lou mau d'os. Èi peréu sudourifico (erbo-dóu-marfoundamen), antispasmoudico e sedativo. Fretado sus la pèu levo la doulour e fai veni rouge (rubeficanto).

Port : Erbo
Taio : 15 à 60 cm
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Caltha
Famiho : Ranunculaceae

Ordre : Ranunculales

Coulour de la flour : Jauno
Petalo : >6
Ø (o loungour) flour : 2 à 4 Cm
Flourido : Printems - Estiéu

Sòu : Ca
Autour basso e auto : 800 à 2300 m
Aparado : Noun
Abriéu à juliet

Liò : Riéu - Prado umido - Palun - Sourgènt
Estànci : Coulinen à Subaupen
Couroulougi : Bourealo
Ref. sc. : Caltha palustris L., 1753

Barbiho-de-la-grando

Barbilophozia lycopodioides

Anastrophyllaceae

Nom en français : Grande barbille.

Descripcioun :
Aquesto grando barbiho crespudo trachis sus li roucas séusous de mountagno dins li relarg fres. Fai ges de gemo, mai i'a d'amfigastre. Se recounèis à si fueio subsimetrico di tres à quatre lobe sus de ramo de tipe Frullania e acabado pèr de benc (fotò). Se vèi peréu de ciho à la baso de la fueio (fotò). Li celulo caupon de 3 à 10 ouleoucors. La planto èi marcado sus listo roujo categourìo LC valènt à dire soucit minour.

Usanço :
Es poussible de s'engana emé d'àutri epatico dóu meme gènre (coume B. hatcheri) o emé : Trilophozia quinquedentata, Saccobasis polita...